Vawiin chawhnu dar 3:00 khan DC Conference Room, Saitualah, Saitual District Joint Working Committee for PACS…

Vawiin chawhnu dar 3:00 khan DC Conference Room, Saitualah, Saitual District Joint Working Committee for PACS chu District Bawrhsap Dr. Lalngura Tlau kaihhruainain an thu khawm.
He hunah hian Dr. Lalngura Tlau chuan thu sawiin, PACS chu thingtlang mite hmasawnna atana sawrkar laipui hmalakna pawimawh tak a ni, a ti a. Bawrhsap chuan khaw hrang hranga mipuite zingah inbumna nia rinhlelh avanga PACS chungchang bengkhawn ṭha duh lo an awm ṭhin chu pawi a tih thu sawiin, PACS hmanga mi hlawhtling te chuan PACS-a rinna nghah ngamna mipuiah a tuh phah ngei a beisei thu a sawi.
Vawiin ṭhutkhawmah hian Pi. H.lalhmachhuani, District Development Manager (DDM), NABARD, JWC for PACS Member Secretary ni bawk chuan PACS din tumna khaw 15 thlan chhuah te chu a tarlang a, hei bakah hian khaw dang 4 belhin, heng khuaa hma an lak dan te a sawifiah nghal a ni.
DDM chuan PACS chungchanga inhrilhhriatna leh inzirtirna – awareness campaign chu khaw 19-ah kalpui tawh a ni tih a sawi. Heng khaw zingah hian N.Lungpher chu ziahluh (registered) tawh niin, Buhban leh Lenchim te chuan dilna an thehlut tawh a, Saitualah hian society awm sa siam ṭha tura dilna thehluh a ni tawh bawk.
JWC for PACS te chuan kumin chhungin heng khaw 7 – Lamzawl, Chiahpui, Phullen, Mualpheng, Ṭawizo, Hliappui leh Ngopa Hmar Vengah te DDM, NABARD kaihhruaina leh JWC member te ṭawiawmnain inzirtirna – Awareness Campaign neih ni se tih rel a ni.
Vawiin ṭhutkhawma thurel hi District Cooperative Development Committee (DCDC) ah ngaihtuahho leh niin, JWC rawtna chhawp chhuah te chu pawm a ni a. DCDC chuan registration dilna thehluh te hi a rang lama bawhzui ni se tih an rel a ni.
Vawiin ṭhutkhawmah hian Dr. Lalngura Tlau, DC, Pi Lalhmachhuani, DDM, NABARD, Pu Lalthangfala, DCO, Pu H.Lalhmangaihzuala, Branch Manager, MCAB, Dr. H.Vanlalhmangaihzuala, DAH & VO, Pu Jacob Lalmalsawma, DHO, Pi Hmangaihthangi Renthlei, DAO, Pi F.Zodingpuii, DIPRO leh Pi Deborah Lalnghakmawii, FD te an tel a ni.