Saitual Bawrhsap Dr. Lalrozama, IAS, Lalngura Tlau leh Saitual Superintendent of Police, Pu Gaurav Tyagi te chuan Saitual Hmar Venga One Stop Centre…

Vawiin chawhma dar 10:00 khan Saitual Bawrhsap Dr. Lalngura Tlau leh Saitual Superintendent of Police, Pu Gaurav Tyagi te chuan Saitual Hmar Venga One Stop Centre te chu tlawhin an endik a, Pi Runremsangi, Centre Administrator, OSC chuan a lo dawngsawng.
He hunah hian District Bawrhsap, Dr. Lalngura Tlau chuan thu sawiin, OSC chu hmeichhia hleihlenna tawk leh baihvaite tluk luhna pawimawh tak a ni tih a sawi a, OSC-a thawktute chu an thawhrimna fakawm a tih thu a sawi bawk. Bawrhsap chuan OSC chu Health, Police leh Excise department te nen pawha thawhhona ṭha tak an neih a ṭul tih a sawi a, hmeichhia leh naupangte chunga hleihlenna tihkiam a nih zel theih nan OSC staff te chu theih tawp chhuah zel turin a fuih nghal.
Ministry of Women & Child Development, Govt. of India leh Social Welfare Department, Govt. of Mizoram aṭanga thupek dawn angin leh OSC Monitoring Committee-in a lo rel tawh angin, vawiin khan DC, SP, SDPO, OSC Nodal Officer te chuan OSC an endik a, endikna (inspection) report hi a hmunah ziah nghal a ni bawk.
Saitual District-a One Stop Centre hi Multi-Shopping Complex, DC Office Building hlui, Saitual Hmar Veng-ah a awm a, tunah hian Staff 13 an awm mek a. Staff zingah hian centre administrator, case worker, para legal personnel, counsellor, office assistant, multi-purpose worker leh security te an awm a ni. OSC-ah hian hmeichhia leh naupang harsatna tawk te chu ni 5 chhung an awm thei a, an awm chhungin an ei leh in te chu a thlawna pek vek an ni. OSC aṭang hian harsatna tawk lo kal te chu an dinhmun azirin an chhungte inah emaw Shakti Sadan, Aizawlah emaw thawn ṭhin a ni.
Vawiin OSC tlawh leh endiknaah hian, District Bawrhsap Dr. Lalngura Tlau, Pu Gaurav Tyagi, SP, Pu Lalṭhakima Chhangte SDO(S), Pu Lalṭanpuia SDPO, Pi F.Zodingpuii, DIPRO te an tel a, Pi Runremsangi, Centre Administrator, OSC leh OSC staff ten lo dawngsawngin inkawmhona hun an nei nghal a ni.